ကြင်နာမှု မျိုးစေ့ကလေးများကို အစဉ်ဖြန့်ကြဲပါ။

တစ်ရံသော် နာမည်ကျော် ဘင်ဂျီအမည်ရှိ ဝန်ကြီးချူပ်သည် ပါတီပွဲတစ်ခုသို့ သွားနေစဉ် သူ့ကိုယ်ရံတော်တစ်ဦးမှာ အတန်အရက်မူးနေပြီး ဗြုန်းခနဲ ဝန်ကြီးချူပ်၏ ယာဉ်ကော်ဇော်အပေါ် အန်ချလိုက်သည်။ ထိုအခါ အမှုထမ်းတစ်ဦးက ကြိမ်းမောင်းပြီး ဝန်ကြီးချူပ်အား ဤအရက်မူးနေသူကို ချက်ချင်း အလုပ်ထုတ်ပစ်ရမည်လောဟု မေးသည်။ ထိုအခါ ဝန်ကြီးချူပ်က ဒေါသမထွက် တည်ငြိမ်စွာပင်..

"မထုတ်ပါနဲ့ အဲဒီ လူငယ်ဟာ လူတော်ပါ။ သူ့ကို အလုပ်ထုတ်လိုက်ရင် နာမည်ပျက်ပြီး ဘယ်နေရာမှာမှ အလုပ်ကောင်းရ နိုင်တော့မှာ မဟုတ်ဘူး။ သူ့ရဲ့နောင်ရေးကို ငါ မဖျက်ဆီးချင်ဘူး။ တစ်ပါးသူကို သနားစာနာတတ်ရတယ်။ သူ ကော်ဇောကို မတော်တဆ ပေစေတာပဲ။ အဲဒါဟာ ကြီးကျယ်တဲ့ ပြစ်မှုကြီး မဟုတ်ဘူး။ ငါ ဂရုမထားပါဘူး" ဟု ပြန်ပြောသည်။

ထိုခေတ်က အသက်တစ်ချောင်း အထူးသဖြင့် အခိုင်းအစေတို့နှင့် ကျွန်တို့၏ အသက်မှာ တန်ဖိုးမရှိချေ။ ယခု အမူးသမားပြစ်မှု အသေးအမွှားမျိုးကို အခိုင်းအစေတို့ ကျူးလွန်က ပြင်းထန်စွာ အပြစ်ပေးခံရပြီး အချို့အသတ်ပင် ခံကြရသည်။ အမှုထမ်းမှာ ပထမတွင် ဝန်ကြီးချူပ်၏ ရက်ရောမှုကြောင့် အံအားသင့်သွားသည်။ ထို့နောက် ခွင့်လွှတ်ကြောင်း ကြောက်ရွံ့နေသည့် အမူသမားကို ပြောပြရာ အံ့အားသင့် ဝမ်းမြောက်မဆုံး ဖြစ်ရှာသည်။ ထိုကိစ္စ ဖြစ်ပြီးနောက် ဝန်ကြီးချူပ်မသိပါဘဲ၊ အထူးသစ္စာရှိသော အစေအခိုင်းတစ်ဦး ရရှိသွားခဲ့လေသည်။ ထိုသူသည် မိမိ၏ စိတ်နှလုံးကောင်းလှသူ ဆရာအဖို့ လိုအပ်လျှင် မိမိအသက်ကိုပင် ကြည်ကြည်ဖြူဖြူ စွန့်လွှတ်မည့်သူ ဖြစ်လာသည်။

ကိုယ်ရံတော်မှာ ခွင့်ပြန်ရသောတစ်နေ့တွင် မိမိနေရာ အနောက်ဘက်ဒေသရှိ ရွာသို့ ပြန်ခဲ့သည်။ ရွာ၌ နေစဉ် နီးနားရှိ လူရိုင်းများက နယ်ခြားကို ချဉ်းနင်းတိုက်ခိုက်မည်ဆိုသည့် ကောလာဟလကို ကြားရလျှင် ချက်ချင်းပြန်ပြီး ထိုသတင်းကို ဝန်ကြီးချူပ်အား ပေးသည်။ ထို့ကြောင့် နယ်ခြားစောင့်တပ်ကို ချက်ချင်း အင်အားဖြည့်တင်းလိုက်သည်။ ရက်များ မကြာမီ နယ်ခြားသို့ လာရောက်တိုက်ခိုက်ခံရရာ စစ်တပ်မှာ ကြိုသတင်းရ၍ ကြိုတင် ပြင်ဆင်မှုရှိသောကြောင့် အကျအဆုံး နည်းပါးစွာနှင့် တိုက်လာမှုကို တွန်းလှန်နိုင်ကြသည်။

နောက်မကြာမီ ဘုရင်၏ စစ်အစည်းအဝေးကြီးတွင် ဘုရင်ကြီးက ဤတိုက်ခိုက်လာမှု ကိစ္စအတွက် အဆင့်မြင့်အရာရှိများ၊ ရာထူးရင့် စစ်ဗိုလ်ချုပ်များကို တစ်ဦးစီကို စစ်ပွဲအကြောင်း မေးမြန်းသည်။ မည်သူမျှ နောက်ကြောင်း ဗဟုသုတ ပြောပြနိုင်ခြင်းမရှိဘဲ ဝန်ကြီးချူပ်တစ်ဦးကသာ ပြောပြနိုင်သဖြင့် ကြီးစွာ ချီးကျူးခံရသည်။ ဝန်ကြီးချူပ်ကို ဘုရင်ကြီးက ဆုလာဘ်များစွာ ချီးမြှင့်တော်မူသည်။

ကြင်နာမှု မျိုးစေ့ကလေးများကို အစဉ်ဖြန့်ကြဲပါ။ ထိုမျိုးစေ့များအတွင်းမှ အစေ့အချို့သည် ရှင်သန်ပေါက်ဖွားပြီး နောင်တွင် အောင်မြင်ခြင်းပန်းများ ဖြစ်လာမည်။

Photo from pixabay.com